Ambasada e Gjermanisë në Kosovë ka përkrahur protestën e shoqërisë civile sot para Kuvendit të Kosovës, për dështimet e vazhdushme të konstituimit të legjislaturës së nëntë.

Në reagimin e saj zyrtar, ambasada thekson rëndësinë e funksionimit të institucioneve demokratike, duke e quajtur Kuvendin gurthemel të demokracisë.

“Institucionet funksionale janë gurthemeli i demokracisë. E përkrahim mesazhin e fuqishëm të dhënë sot nga shoqëria civile: Kosovës i duhet një Kuvend funksional, një Kryetar Kuvendi i zgjedhur dhe një Qeveri që punon – për të gjithë qytetarët”, thuhet në deklaratën e ambasadës.

Ambasadori gjerman në Kosovë, Jorn Rohde, citohet të ketë theksuar vazhdimisht parimin “shteti mbi politikën partiake”, ndërsa ambasada apelon për përgjegjësi të përbashkët nga të gjithë deputetët dhe partitë e zgjedhura.

“Mandatet demokratike sjellin me vete përgjegjësi. Le të ecim përpara – për stabilitet, për progres dhe për qytetarët”, përfundon reagimi.