Një ngjarje tragjike tronditi qytetin e Hagen-it të mërkurën vonë në mbrëmje, ku pas një grindjeje të ashpër, një burrë sirian 37-vjeçar dyshohet se vrau me thikë partneren e tij 31-vjeçare.

Sipas raportimeve nga mediat gjermane, në apartamentin e papafingos ku ndodhi ngjarja, në atë kohë ishin edhe fëmijët e çiftit.

Rreth orës 22:50, një vajzë që bërtiste brenda apartamentit telefonoi policinë, duke lajmëruar ngjarjen. Në vendin e ngjarjes mbërritën menjëherë hetuesit dhe shërbimet e emergjencës në rrugën Märkischer Ring. Atje, burri sirian dyshohet se e goditi disa herë me thikë partneren e tij, raporton Bild.

Gruaja u dërgua me urgjencë në spital, ku për fat të keq vdiq nga plagët e rënda.

Policia dhe prokuroria njoftuan se 37-vjeçari u arrestua pa rezistencë në apartament dhe u paraqit të enjten para gjykatës, e cila e la në paraburgim.