Policia e Tiranës ka finalizuar pas disa muajsh hetime intensive dhe me metoda proaktive, operacionin policor të koduar “Blloku 33”, që ka çuar në goditjen e disa grupeve kriminale të përfshira në shitjen e drogave të forta në lokalet e natës në zonën e ish-Bllokut.

Hetimet, të drejtuara nga Prokuroria pranë Gjykatës së Shkallës së Parë të Juridiksionit të Përgjithshëm dhe të zhvilluara nga Seksioni për Hetimin e Narkotikëve në bashkëpunim me Forcën e Posaçme Operacionale të DVP Tiranë, kanë identifikuar 42 persona të përfshirë në këtë aktivitet kriminal, shkruan A2 CNN.

Gjykata ka caktuar 33 masa sigurie, prej të cilave janë ekzekutuar 25:

· 24 shtetas janë arrestuar me masën “Arrest në burg”,

· 1 shtetas është vendosur në “Arrest në shtëpi”.

Ndërkohë, 8 shtetas të tjerë janë shpallur në kërkim dhe vijon puna për kapjen e tyre.

Gjatë operacionit dhe kontrolleve në banesat e të arrestuarve, janë sekuestruar:

· 1 kg e 964 gramë kokainë,

· 450 gramë heroinë,

· 85 kg Cannabis Sativa (të sekuestruara gjatë hetimeve paraprake),

· 2 armë zjarri pistoleta,

· 29 celularë,· 6 automjete,

· 4 peshore elektronike,

· shuma të konsiderueshme parash në lekë dhe euro, që dyshohet se janë përfituar nga trafiku i lëndëve narkotike.