Deputetja e Lëvizjes Vetëvendosje, Albulena Haxhiu, ka komentuar krizën aktuale politike dhe ngecjen në konstituimin e Kuvendit të Kosovës, pas dështimit për herë të 31-të të këtij procesi.

Në një deklaratë për media, Haxhiu theksoi se përgjegjësia për zhbllokimin e situatës nuk i takon vetëm Vetëvendosjes, por të gjithë deputetëve.

E pyetur për propozimin e LDK-së për një Qeveri Uniteti, Haxhiu tha se fillimisht duhet arritur marrëveshje për konstituimin e Kuvendit.

Nuk e kam lexuar këtë plan, nuk mund t’i komentoj pikat. E rëndësishme është që është absurde të mblidhesh të votosh për 15 pikat kur ne s’po merremi vesh për konstituimin e Kuvendit. Së pari duhet unitet për konstituimin e Kuvendit dhe pastaj të flasim për pikat tjera”, tha Haxhiu.

Haxhiu gjithashtu rikujtoi se Vetëvendosje ka qenë e gatshme për bashkëpunim me LDK-në, por kjo e fundit ka refuzuar ofertën. Ajo kritikoi qëndrimin e LDK-së, duke e akuzuar se po insiston në përfshirjen e PDK-së në koalicion.