Shtetet afrikane kanë humbur rreth 60 milionë euro në vitin 2024 si pasojë e refuzimeve të aplikimeve për viza afatshkurtra Schengen, sipas një analize nga organizata britanike LAGO Collective.

Shembulli i Joel Anyaegbu, një konsulent lojërash nga Nigeria, është një nga mijëra të ngjashëm: ai u përball me dy refuzime për vizë për të udhëtuar në Barcelonë, pavarësisht se kishte paraqitur dokumentacion të plotë dhe dëshmi të pasurisë në vendin e tij. Ai e cilësoi përvojën si poshtëruese, duke thënë se refuzimi e detyroi të anulonte takime të rëndësishme në një konferencë.

Vetëm nga Nigeria, në vitin 2023 u refuzuan 50,376 aplikime për viza, pothuajse gjysma e kërkesave të bëra. Me një tarifë aplikimi jo të rimbursueshme prej 90 eurosh për person, kjo i ka kushtuar nigerianëve mbi 4.5 milionë euro.

Sipas LAGO Collective, vendet më të varfra, përfshirë shumë në Afrikë si Gana, Senegali dhe Nigeria, përballen me normat më të larta të refuzimit – që arrijnë deri në 40-50%.

Komisioni Evropian tha se çdo aplikim për vizë shqyrtohet individualisht dhe nga vendimmarrës me përvojë, duke marrë parasysh qëllimin e udhëtimit, burimet financiare dhe vullnetin e aplikantit për t’u kthyer në vendin e tij. Megjithatë, kritikat për trajtimin e padrejtë të aplikantëve nga vendet afrikane vazhdojnë të shtohen. / abcnews.al