Parlamenti i Kosovës ka dështuar për të 19-ën herë radhazi të zgjedhë një kryetar të ri të mërkurën, duke thelluar ngërçin politik dhe duke shkaktuar shqetësime për një reaksion të ashpër ekonomik në një nga vendet më të varfra të Evropës.

Reuters raportoi për situatën e tensionuar politike në Kosovë, duke theksuar se bllokimi i procesit të formimit të qeverisë mund të ketë pasoja të rënda ekonomike, duke rritur frikën për një ndikim negativ në ekonominë e vendit, pas muajve të tërë paqartësish dhe tensioneve politike në një nga shtetet më të varfra të Evropës.

“Ligjvënësit kanë mbajtur seanca çdo 48 orë që nga mesi i prillit për të zgjedhur një kryetar të ri, një hap kyç që duhet të ndodhë përpara se Kryeministri Albin Kurti, një nacionalist i majtë, të mund të përpiqet të formojë një qeveri koalicioni. Pas humbjes në zgjedhjet e shkurtit, Kurti ka pasur vështirësi për të siguruar shumicën e nevojshme në parlament”, shkruan mediumi

Reuters raporton se, nëse ngërçi politik në Kosovë vazhdon, vendi mund të rrezikojë të humbasë financimet e rëndësishme nga Bashkimi Evropian dhe Banka Botërore.

“Për shkak të vonesave politike, Kosova mund të humbasë financime të rëndësishme nga Bashkimi Evropian dhe Banka Botërore, të cilat janë të destinuara për projekte kyçe në sektorët e shëndetësisë, arsimit dhe energjisë së gjelbër. Ekspertët e ekonomisë kanë paralajmëruar se Kosova, një shtet i vogël me 1.6 milion banorë që shpalli pavarësinë nga Serbia në vitin 2008, po përballet me rrezikun që të vonojë ose humbasë 700-800 milionë euro financime për projekte të rëndësishme”, thuhet në artikull.