Partia Demokratike e Kosovës (PDK) ka mirëpritur vendimin e Gjykatës Kushtetuese që shpalli Ligjin për Komisionin e Pavarur të Mediave si anti-kushtetues.

“Lajm shumë i mirë sot nga Gjykata Kushtetuese, e cila vërtetoi edhe një herë se pushteti në ikje ka shkelur Kushtetutën! Vendimi për ta shpallur Ligjin nr. 08/L-289 për Komisionin e Pavarur të Mediave si anti-kushtetues është dëshmi e qartë se qeverisja e kaluar e ka përdorur shumicën parlamentare për të kapur institucionet e pavarura, në kundërshtim me parimet kushtetuese dhe demokratike”, thuhet në reagimin e PDK-së.

Sipas PDK-së, ky nuk është rasti i parë që Gjykata Kushtetuese e rrëzon një ligj të qeverisjes së kaluar.

Partia thekson se e mirëpret këtë vendim dhe riafirmon zotimin “për të garantuar liri të mediave, pavarësi institucionale dhe sundim të ligjit”./Arbresh.info/