Kryetari i Aleancës për Ardhmërinë e Kosovës (AAK), Ramush Haradinaj, mori pjesë në garën tradicionale të skijimit “Kupa e Gjeravicës”, e cila u mbajt në bjeshkët e bukura të Belegut dhe u organizua nga Komuna e Deçanit në bashkëpunim me Federatën e Skitarisë së Kosovës.

Haradinaj u shpreh i inkurajuar nga pjesëmarrja e madhe e qytetarëve dhe rritja e interesimit për sportet dimërore në vend.

Ai theksoi se bukuritë natyrore të Kosovës dhe kapacitetet që ofrojnë bjeshkët janë dëshmi e potencialit të madh për zhvillimin e mëtejmë të turizmit dhe sportit të skijimit.

“Bashkë me shumë qytetarë, në bjeshkën e bukur të Belegut, pamë nga afër garën e skijimit “Kupa e Gjeravicës”, organizuar nga Komuna e Deçanit dhe Federata e Skitarisë së Kosovës. Është inkurajuese të shohësh rritjen e interesimit për sportet dimërore, ndërsa bukuritë natyrore dhe kapacitetet që ofrojnë bjeshkët tona dëshmojnë potencialin e madh për zhvillimin e turizmit dhe sportit të skijimit në vendin tonë”, ka shkruar Haradinaj.

“Kupa e Gjeravicës” po kthehet në një ngjarje të rëndësishme për promovimin e sporteve dimërore dhe turizmit malor në rajonin e Dukagjinit./Arbresh.info/