PSV Eindhoven është mposhtur 2-0 nga Ajax të dielën, një humbje që ka ndikuar në shpresat e tyre për titullin Eredivisie këtë sezon. Pas këtij rezultati, lojtarët e PSV-së, Luuk de Jong dhe Noa Lang, kanë deklaruar se gara për titull ka mbaruar për ta, duke pranuar se tani duhet të përqendrohen në vendin e dytë.

Me këtë humbje, PSV mbetet tani nëntë pikë pas Ajax, me vetëm shtatë ndeshje të mbetura. Ky hendek është shumë i madh për t’u përmbysur në këtë fazë të kampionatit.

“Ne nuk mundëm të ushtronim presion mbi ta”, ka thënë pas ndeshjes kapiteni i PSV, Luuk de Jong. “Ne u detyruam të mbroheshim. Por edhe aty, nuk arritëm të merrnim kontrollin e lojës. Nuk krijuam mundësi, gjë që zakonisht mund dhe duhet ta bëjmë”.

De Jong ka pranuar humbjen e mundësisë për të fituar titullin të dytë radhazi. “Duhet të përqendrohemi te vendi i dytë”, ka shtuar ai. “Nëntë pikë janë shumë. Duhet të përqendrohemi te vendi i dytë dhe të arrijmë të luajmë në Champions League”.

Edhe sulmuesi tjetër, Noa Lang, ka hequr dorë nga titulli pas humbjes së dytë ndaj Ajax këtë sezon. “Kemi humbur dy herë ndaj Ajax dhe tani kampionati ka mbaruar. Duket se nuk mundëm të menaxhonim presionin. Ky është realiteti”, ka thënë Lang.

Ai ka shtuar se Ajax ishte shumë kompakt dhe se ata nuk mundën ta kalonin mbrojtjen e fortë të tyre. “Ndoshta ishim shumë statikë. Nuk e bëmë mirë. E meritonim”, ka përfunduar Lang./rtk