Presidentja e vendit, Vjosa Osmani ka përkujtuar sot 26-vjetorin e fillimit të bombardimit të NATO-s mbi caqet serbe.

Me anë të një postimi në Facebook, Osmani tha se në atë ditë, aleatët e NATO-s u ngritën kundër të keqes për të mbrojtur një popull që po luftonte për ekzistencë, përcjell Arbresh.info

“24 Marsi, dita kur liria mori krahë! Ishte dita kur bota demokratike nuk heshti! Dita kur aleatët e NATO-s u ngritën kundër së keqes, për ta mbrojtur një popull që po luftonte për ekzistencë, i rrezikuar nga regjimi gjenocidal i Serbisë. Ishte dita kur ndaj errësirës triumfoi drita e shpresës”, ka shkruar e para e shtetit.

“Nga flaka e sakrificës dhe lufta çlirimtare, lindi Kosova e lirë! 26 vjet më pas, Kosova ecën krenare, sovrane dhe e palëkundur drejt të ardhmes më të ndritur. Lavdi të gjithë të rënëve për liri! Falënderim aleatëve që ndihmuan kauzën tonë për Kosovën shtet të lirë, të pavarur e sovran!”, tha Osmani./Arbresh.info