Edhe gjatë fundjavës ka vazhduar greva e kompanive të linjës së autobusëve Podujevë-Prishtinë, për shkak të pakënaqësisë ndaj vendimit të Komunës së Prishtinës që të mos i lejojë autobusët nga kjo linjë të futen në qendër të qytetit.

Ky vendim i komunës është konsideruar i kundërligjshëm nga grevistët, të cilët kërkojnë respektimin e tij, duke paralajmëruar se greva mund të radikalizohet nëse kërkesat e tyre nuk plotësohen.

Nga ana tjetër, Komuna e Prishtinës kërkon që grevistët të respektojnë këtë vendim, ashtu siç respektohen edhe linjat ndërurbane nga qytete të tjera të Kosovës.

Ka pesë ditë që autobusët nuk janë ndezur. Edhe transporti i udhëtarëve nga Podujeva në Prishtinë nuk ka ndodhur. Ndonëse të parkuar në vend të ndaluar ata gjobiten nga policia.

Megjithatë, dënimet e policisë nuk po i shqetësojnë aq shumë sa vendimi i komunë së Prishtinës që të mos i lejojë autobusët nga kjo linjë të futen në qendër të qytetit.

Si i tillë, përfaqësues të grevistëve thonë se, komuna nuk është duke i marrë parasysh kërkesat e tyre, të cilën e kanë, respektimin e ligjit.

Mentor Mustafa, nënkryetar i Shoqatës së Transportit ” Llapi” tha se secila kompani i ka oraret, secila kompani është e certifikuar nga Ministria e Transportit dhe kërkojnë veç çka u takon me ligj.

Mustafa thotë se në rast se kërkesat e tyre nuk realizohet, greva do ndryshojë .

“Do ta bllokojmë krejt qytetin, do t’i vendosim autobusët ne rrugë, derisa të na plotësohen kërkesat tona.”, paralajmëroi ai.

Komunarët sërish edhe sot kanë dhënë përgjigjen e njëjtë duke thënë se protestuesit duhet ta respektojnë vendimin, ashtu siç edhe linjat e qyteteve tjera.

Ndërkohë, zëvendësministri i Infrastrukturës, Hysen Durmishi ka thënë se vendimi i Përparim Ramës për transportin, është në kundërshtim me ligjin, duke kërkuar urgjentisht shfuqizimin e tij.

Sipas Durmishit nëse komuna nuk e shfuqizon vendimin, atëherë do të veprojnë në bazë të përgjegjësive dhe kompetencave ligjore që ata kanë./RTK