Kryetari i Partisë Demokratike të Kosovës (PDK), Memli Krasniqi ka vizituar ish-krerët e Ushtrisë Çlirimtare të Kosovës në Hagë.

Ai foli për takimin me Hashim Thaçin duke thënë se nuk shfaqte asnjë ankesëedhe pse i mohohet e drejta për të parë babanë e tij të sëmurë, shkruan Arbresh.info.

Krasniqi tha se Thaçi me të njëjtën energji dhe optimizëm, foli për Kosovën.

“Sot, një tjetër vizitë në Hagë – në një vend që për Hashim Thaçin dhe çlirimtarët tanë është një betejë e re. Një front ku liria tash e pesë vjet po mbrohet ndryshe – me qëndresë dhe dinjitet.”, ka shkruar ai.

“Presidenti Thaçi, si gjithmonë, i qetë dhe i palëkundur. E di se e vërteta nuk mund të burgoset përgjithmonë. Me të njëjtën energji dhe optimizëm, foli për Kosovën, për rrugën tonë dhe për ndërtimin e një të ardhmeje më të mirë – e cila gjithmonë kërkon sakrificë dhe angazhim të pandalshëm.”, shtoi Krasniqi.

“Asnjë ankesë, asnjë shenjë hidhërimi – edhe pse padrejtësisht i mohohet e drejta për të parë babanë e tij të sëmurë. Vetëm një besim i palëkundur se drejtësia, sado e vonuar, do të triumfojë.”, tha mes të tjerash kreu i PDK-së.

“Dhe kur nata të kalojë e hija e padrejtësisë të shembet – me dritën e së vërtetës dhe të lirisë – Dielli do të lindë përsëri!”, përfundoi ai./Arbresh.info/