Ministri i Administrimit të Pushtetit Lokal, Elbert Krasniqi ka nënshkruar marrëveshjet me kryetarët e komunave përfituese nga skema e Grantit të Performancës Komunale.

Me anë të një postimi në Facebook, ai bëri të ditur se 12 komunat përfituese janë Drenasi, Istogu, Lipjani, Mamusha, Mitrovica e Jugut, Parteshi, Prizreni, Suhareka, Dragashi, Juniku, Kaçaniku, Klina, shkruan Arbresh.info.

Krasniqi shtoi se vlera totale e këtij granti është rreth 8 milionë euro.

Sipas tij, bazuar në këtë grant do të financohen projekte të cilat kanë për qëllim zhvillimin ekonomik lokal, gjithpërfshirjen dhe digjitalizimin e shërbimeve komunale.

“Ministria e Administrimit të Pushtetit Lokal, i ka kushtuar rëndësi të veçantë rritjes së transparencës dhe fuqizimit të këtij granti. Lidhur me këtë tashmë ky Granti i Performancës Komunale bazohet në ligjin përkatës të votuar në Kuvendin e Republikës së Kosovës”, thuhet në njoftim./Arbresh.info/