Presidenti i Ukrainës, Volodymyr Zelensky, dhe Kryeministri i Mbretërisë së Bashkuar, Keir Starmer, kanë nënshkruan një marrëveshje për të përshpejtuar dhënien e huave prej 2.8 miliardë dollarësh (2.26 miliardë paund) për Ukrainën.

Huaja do të shlyhet me të ardhurat nga asetet sovrane ruse të ngrira, tha kancelarja e Thesarit të Mbretërisë së Bashkuar, Rachel Reeves. Marrëveshja është pjesë e “mbështetjes të pandërprerë dhe të vazhdueshme” të Mbretërisë së Bashkuar për popullin ukrainas, shtoi Reeves, raporton CNN.

Ministri i Financave i Ukrainës, Serhiy Marchenko, i cili mori pjesë në takimin nëpërmjet një lidhjeje video, tha se Ukraina është “shumë mirënjohëse” për këtë “marrëveshje shumë të nevojshme.”

Huaja është një shtesë ndaj financimit të vazhdueshëm të Mbretërisë së Bashkuar prej rreth 3.7 miliardë dollarësh (3 miliardë paund) çdo vit për Ukrainën, tha Reeves.

Reeves shtoi se ajo ishte e befasuar nga “mbështetja ndërpartiake” për këtë marrëveshje gjatë kalimit të saj në Parlament.

“Këto para kanë të bëjnë me ndihmën për të siguruar integritetin territorial të Ukrainës,” tha Reeves, duke shtuar se fondet gjithashtu forcojnë “sigurinë dhe ardhmërinë e të gjithë Evropës.”