Blloku i qendrës së djathtë të Gjermanisë CDU/CSU është në rrugën e duhur për një fitore të qartë në zgjedhjet parlamentare të së dielës, edhe pse mbështetja për të djathtën ekstreme u rrit, sipas sondazheve nga ARD dhe ZDF.

Rezultati hap rrugën që lideri konservator Friedrich Merz të jetë kancelari i ardhshëm i ekonomisë më të madhe të Bashkimit Evropian dhe të pasojë socialdemokratin Olaf Scholz – në varësi të rezultatit të bisedimeve për koalicionin.

Kristian-demokratët (CDU) e Merz dhe partia e tyre motër bavareze, Unioni Kristian-social (CSU) parashikohet të fitojnë midis 28,5% dhe 29% të votave nga dy sondazhet, të cilat u publikuan menjëherë pasi votimi përfundoi në orën 18:00 (17:00 GMT) të dielën.

Alternativa e ekstremit të djathtë për Gjermaninë (AfD) u rrit në mes 19,5% dhe 20% në sondazhet e daljes, një rritje e madhe në mbështetje për partinë e linjës së ashpër kundër imigracionit krahasuar me 10,4% që fitoi në zgjedhjet e 2021.

Social-demokratët (SPD) të qendrës së majtë të Scholz do të pësojnë një disfatë të shumëpritur, duke rënë në vendin e tretë me 16%, shfaqja më e keqe në zgjedhjet kombëtare në dekada për partinë.

Të gjelbrit, ndërkohë, u renditën në vendin e katërt me 12% ndaj 13,5%, sipas exit polls.

Exit poll-et, nëse konfirmohen në rezultatet aktuale të zgjedhjeve, tregojnë për një zhvendosje të mprehtë drejt së djathtës në Gjermani dhe një kthim në pushtet për CDU/CSU më pak se katër vjet pasi ish-kancelarja Angela Merkel doli në pension.

Merz pritet t’i drejtohet së majtës së tij politike për bisedime për koalicionin, pasi të gjitha partitë kryesore, duke përfshirë CDU/CSU-në e tij, kanë përjashtuar vazhdimisht dhe me forcë çdo marrëveshje me AfD-në.

Prandaj, pyetja kryesore pasi të dalin rezultatet do të jetë se cilat opsione koalicioni janë në dispozicion – dhe sa kohë do të duhet për të mbledhur qeverinë e ardhshme të Gjermanisë.