Drejtori i Përgjithshëm i Shërbimit Korrektues të Kosovës (SHKK), Ismail Dibrani, ka pritur në takim ambasadorin e Republikës së Shqipërisë në Kosovë, Petrit Malaj.

Gjatë këtij takimi, Dibrani e informoi ambasadorin Malaj lidhur me sfidat dhe të arriturat e SHKK-së, si dhe për përpjekjet e vazhdueshme në fushën e korrektimit, risocializimit dhe rehabilitimit të personave të privuar nga liria.

“Ambasadori Malaj vlerësoi punën e SHKK-së dhe theksoi rëndësinë e bashkëpunimit mes dy vendeve në këtë fushë, ndërsa u interesua edhe për trajtimin e shtetasve të Shqipërisë që po mbahen në institucionet tona korrektuese”, thuhet në njoftimin për media nga SHKK-ja.

Tutje thuhet se të dy palët diskutuan për thellimin e bashkëpunimit dhe shkëmbimit të përvojave mes institucioneve përkatëse të të dyja vendeve, me qëllim të forcimit të kapaciteteve dhe përmirësimit të standardeve në sistemin korrektues./Arbresh.info/