Drejtuesit e koalicionit për Familjen, Eman Rrahmani,  Selim Pacolli,  Ferid Agani dhe Fatmir Smajli, u takuan sot me kryetarin e Organizatës së Veteranëve të Luftës së Ushtrisë Çlirimtare të Kosovës (OVL-UÇK), Hysni Gucati, dhe ish-pjesëtarin e UÇK-së,  Fatmir Sopi.

Gjatë takimit, u diskutuan çështje të rëndësishme që lidhen me të drejtat dhe sfidat me të cilat përballen veteranët, duke përfshirë përmirësimin e kushteve sociale, shëndetësore, si dhe mbrojtjen e dinjitetit të tyre, transmeton Arbresh.info.

Në njoftimin e koalicionit për Familjen bëhet e ditur se liderët kanë theksuar angazhimin e tyre të fortë për mbështetje konkrete dhe intensivimin e dialogut me qëllim që të zgjidhen problemet që prekin kategoritë e dala nga lufta.

“Ata u shprehën të vendosur për të punuar së bashku për të siguruar një mbështetje të vazhdueshme dhe të qëndrueshme për ish-luftëtarët, duke përmirësuar kushtet e jetesës dhe duke ruajtur nderin dhe dinjitetin e tyre. Ky takim është një hap i rëndësishëm në forcimin e bashkëpunimit mes institucioneve dhe veteranëve, me qëllim krijimin e mundësive të reja për përmirësimin e jetës së tyre dhe të ardhmes së vendit”, thuhet në njoftim./Arbresh.info