OKB: Nevojiten më shumë fonde për Gazën

12:19 | 24 Janar 2025
Q L

Mungesa e financimit mund të ndikojë në aftësinë e OKB-së për të mbajtur flukset e ndihmave në nivelet e synuara përgjatë marrëveshjes së armëpushimit të Gazës, sipas koordinatorit humanitar të organizatës për territorin e pushtuar palestinez.

Muhannad Hadi i tha agjencisë së lajmeve Reuters se ai ishte “shumë i lumtur” me mënyrën se si kishin kaluar ditët e para, por e cilësoi financimin si shqetësim.

Dërgesat ditore janë rritur dhjetëfish që nga marrëveshja e armëpushimit të së dielës, sipas të dhënave të OKB-së, duke tejkaluar objektivin e 600 kamionëve në ditë.

“Ne kemi nevojë për financim të menjëhershëm për t’u siguruar që do të vazhdojmë të ofrojmë ndihmën për 42 ditët, por edhe pas 42 ditësh, sepse shpresojmë se do të shkojmë nga faza e parë në fazën e dytë,” tha ai, pasi u kthye nga Gaza në fillim të kësaj jave./abcnews/