Kryetari i LDK-së, Lumir Abdixhiku, ka pritur ambasadorin e SHBA-së, Jeffrey Hovenier, në një takim lamtumirës, duke e falënderuar për angazhimin dhe përkushtimin e tij gjatë mandatit si ambasador dhe si përfaqësues amerikan gjatë viteve të shpalljes së pavarësisë së Kosovës.

Abdixhiku ka vlerësuar Hovenierin për njohuritë e thella mbi Kosovën, përfaqësimin e interesave strategjike të SHBA-ve dhe kujdesin e tij për forcuar marrëdhëniet mes dy popujve.

‘E falenderova për gjithë angazhimin e gjithë përkushtimin e tij, jo vetëm si ambasador, por dhe si përfaqësues amerikan i viteve të shpalljes së pavarësisë. Jeff ka qenë njohës i mirë i Kosovës, ka qenë përfaqësues i mirë i interesave strategjike të SHBA-ve në Kosovë; dhe mbi të gjitha kujdestar i përkushtuar i relacioneve mes dy popujve”, tha ai.

Kryetari i LDK-së ka bërë të ditur se ka dhuruar nga një fanellë të kombëtares së Kosovës për secilën nga gjashtë mbesat dhe nipin e Hovenierit.

“Jeff, ka qenë pasionant i futbollit kosovar. Kemi ndjekur bashkë lojëra të shumta të Kombëtarës së Kosovës. Në LDK, u kujdesëm që si gjysh i 6 mbesave e 1 nipi që është – Charlotte, Oliver, Lucie, Jacqueline, Katherine, Madeline, Amelia – me të kthyer në shtëpi, t’u dhurojë atyre nga një fanellë të kombëtares sonë me emrat e tyre në to. T’i mbajnë si kujtim të përhershëm nga shteti i fundit ku ai shërbeu si ambasadorë”, thekson ai.