Kryeministri i Kosovës, Isa Mustafa, priti të mërkurën në takim ambasadoren e re të Republikës së Kroacisë në Kosovë, Marija Kapitanoviq.

Kryeministri Mustafa e ka njoftuar ambasadoren e re për progresin në Kosovë, duke theksuar përkushtimin maksimal të Qeverisë së Kosovës për zhvillim ekonomik, për integrime evropiane si dhe për fuqizimin e gjithanshëm të institucioneve demokratike dhe sundimin e rendit e ligjit.

Mustafa gjithashtu ka shprehur mirënjohje për përkrahjen që Kroacia ka dhënë për Kosovën në të gjitha fazat, duke theksuar vullnetin e Qeverisë së Kosovës për thellimin e mëtejshëm të bashkëpunimit ndërmjet dy shteteve, duke veçuar mundësitë e bashkëpunimit në fushën e investimeve dhe të zhvillimit ekonomik ndërmjet Kosovës dhe Kroacisë, thuhet në komunikatën e Kryeministrisë.

Ambasadorja e Republikës së Kroacisë në Kosovë, Marija Kapitanoviq vlerësoi të arriturat në Kosovë, duke shprehur përkushtimin e Qeverisë së Kroacisë për bashkëpunim dhe mbështetjen e Kosovës në proceset e ardhshme.

Gjatë takimit u bisedua edhe për përkrahjen e Kroacisë në proceset integruese evropiane të Kosovës, me ç ‘rast kryeministri Mustafa tha se Kosova pret përkrahjen kroate në bartjen e përvojave për procesin e integrimit.