Seuli, kryeqyteti i Koresë së Jugut, regjistroi këtë të reshjet më të mëdha të borës në nëntor, me mot të keq që ngadalësoi trafikun, duke shkaktuar ndërprerje të energjisë dhe anulimin e qindra fluturimeve, ndërsa autoritetet njoftuan se po përgatiteshin për më shumë reshje bore në muajt e ardhshëm.

Të paktën dy persona humbën jetën në aksidente trafiku në autostradat në lindje të kryeqytetit, ndërsa pjesë të strukturave që ranë nga ndërtesat dhe kantieret për shkak të erërave të forta plagosën disa këmbësorë në Seul, raporton Reuters duke cituar mediat koreano-jugore.

Këto janë reshjet më të mëdha të borës në Seul që nga fillimi i regjistrimeve në vitin 1907, tha Agjencia Meteorologjike e Koresë së Jugut.

Më shumë se 200 fluturime janë anuluar ose vonuar, shumica prej tyre të brendshme, për shkak të kushteve të këqija atmosferike në aeroportet në të gjithë vendin, duke përfshirë erërat e forta, dhe të paktën 70 tragete që shërbejnë në ishujt janë pezulluar.

Energjia elektrike u ndërpre në mijëra familje në disa zona të Seulit dhe rajonit qendror pasi linjat e energjisë u dëmtuan nga rënia e pemëve dhe efektet e tjera të lidhura me reshjet e borës./abcnews.al