Gëzim Kelmendi nga partia “Fjala” u ka bërë ftesë publike të garojnë bashkë për zgjedhjet e 9 shkurtit Eman Rrahmanit, Visar Korenicës e Ferid Aganit.

Megjithatë, forma e kërkesës përmes rrjeteve sociale duket se nuk i ka bërë fare përshtypje Rrahmanit nga “Lëvizja për familjen”.

“Unë e pashë statusin e tij në rrjetet sociale. Ne kemi kontakt, kemi adresë. Nuk i kuptoj kërkesat e tilla, qasjen e tillë për bashkëpunime. Ne nuk funksionojmë me statuse. Mua nuk më ka kontaktuar askush. Por, nëse, e them nëse … ai bën kërkesë në formën e duhur atëherë do ta diskutojmë brenda partisë”, ka deklaruar Rrahmani për IndeksOnline.

Ndërkaq, Rrahmani është pyetur edhe rreth deklaratave të kreut të AKR-së, Behxhet Pacolli, pasi ai një ditë më parë ka shprehur pakënaqësi për mungesën e bashkëpunimit brenda këtij koalicioni.

“Koalicioni jonë është duke funksionuar është në editim edhe unë mundem me fol për angazhimin tim, dhe a qëndron a largohet dikush është vendim i secilit. Nuk ka diçka jashtë asaj për çfarë jemi dakordu. Për ata nëse dikush ka ftohje, mundeni me kontaktu ata, na jemi në rregull jemi duke u marrë me aktivitete”, ka deklaruar Rrahmani

Rrahmani ka mohuar të ketë përçarje, derisa është zotuar se në zgjedhjet e 9 shkurtit do të garojnë si koalicion.