Paris Saint-Germaini ka shënuar fitore me rezultat 4-2 në udhëtim ndaj Angers në kuadër të javës së 11-të në Ligue 1.

Mysafirët arritën që të shënojnë dy gola për një kohë të shpejtë, që të dyja me autor Kang-In Lee.

Lee fillimisht shënoi në minutën e 17-të për rezultatin 1-0, teksa vetëm disa momente më vonë, më saktësisht në minutën e 20-të realizoi për 2-0.

PSG-ja nuk u ndal më kaq dhe gjetën edhe golin e tretë, kësaj radhe përmes Bradley Barcola (31’) i cili shënoi me lehtësi për 3-0 pas asistimit të Marco Asensios.

Po i njëjti lojtar e shënoi edhe golin e katërt për PSG-në duke realizuar me kokë për 4-0 pas asistimit të Lee.

Në pjesën e dytë kampioni në fuqi pati edhe disa raste të mira shënimi, por që nuk ia dolën të shënojnë ndonjë gol tjetër.

Vendasit në ndërkohë u ‘ngjallën’ krejt në fund të takimit duke realizuar dy gola të shpejtë përmes Esteban Lepaul (91′) për 4-1 dhe me Emmanuel Biumla (97′) për 4-2, por duke mos arritur t’i shmangen humbjes.

Pas javës së 11-të, PSG-ja vazhdon si lider me 29 pikë në elitën e futbollit francez, duke lënë pas vetes Monacon që ka 23 sosh.