Fillon pilotimi i skemës së reformuar të asistencës sociale, përfitojnë afro 2 mijë familje

12:54 | 4 Nëntor 2024
E.H

Ministri i Financave, Hekuran Murati ka bërë të ditur se ka filluar pilotimi i skemës së reformuar të asistencës sociale.

Me anë të një postimi në Facebook, Murati tha se 1,824 familje do të përfitojnë mbështetje financiare, përcjell Arbresh.info.

“Nga grupi i parë, janë 1,824 familje në nevojë do të përfitojnë mbështetje financiare si pjesë e pilotimit të reformës së skemës së asistencës sociale. Përveç heqjes së kritereve diskriminuese, një gjë tjetër me rëndësi që po bëhet në kuadër të reformës është edhe kërkesa për të gjithë anëtarët e aftë për punë që të regjistrohen në Agjencinë e Punës si punëkërkues”, ka thënë Murati.

“Përmes këtij veprimi, do të sigurohemi që t’i mbështesim ata që të aktivizohen në tregun e punës, dhe familja të krijojë vetëqëndrueshmëri financiare në afatgjatë”, tha ministri Murati./Arbresh.info