Serbia nuk ka avancuar në procesin e negociatave me Bashkimin Europian që nga fundi i viti 2021.

Është një nga konkluzionet e progres-raportit të përgatitur nga Komisioni Europian për Serbinë. Për sa i përket marrëdhënieve me Kosovën, draft-raporti, thekson se përparimi i Serbisë drejt BE-së do të varet në masë të madhe nga progresi në procesin e normalizimit të marrëdhënieve me Kosovën.

“Marrëveshja për rrugën drejt normalizimit të marrëdhënieve, e arritur nga udhëheqësit e Kosovës dhe Serbisë në shkurt të vitit 2023, si dhe Aneksi për zbatimin e saj, janë dokumente ligjërisht të detyrueshme për të dyja palët”, thekson raporti, shkruan A2cnn.

Në draft-raport vlerësohet ka pasur tensione të larta në veri të Kosovës – zonë e banuar me shumicë serbe por edhe fakti se normalizimi i marrëdhënieve të Serbisë me Kosovën vazhdon të ndikohet negativisht nga hapat e pamjaftueshëm të Serbisë për t’i ndjekur përgjegjësit për sulmin e dhunshëm ndaj Policisë së Kosovës, më 24 shtator, 2023, në Banjskë.

Gjithashtu, konsiderohet se tërheqja e serbëve të Kosovës nga institucionet e Kosovës në nëntor të vitit 2022 dhe bojkotimi i zgjedhjeve lokale në veri të Kosovës në prill të vitit 2023, ndikojnë keq në obligimet e Serbisë në dialog.