Kryetari i Partisë Demokratike të Kosovës, Memli Krasniqi ka reaguar pasi seanca e sotme e Kuvendit të Kosovës nuk është transmetuar në televizionin publik.

Në seancën e sotme, deputetët e Vetëvendosjes nuk kanë qenë të pranishëm, dhe për këtë Krasniqi ka thënë se komisarët e Kryeministrit tentuan ta heshtin opozitën dhe ta fshehin të vërtetën, duke mos transmetuar seancën, përcjell Arbresh.info.

“Është jetike që kjo Qeveri e kapelave të zeza të bie! I zënë pamohueshëm në flagrancë duke vepruar kundër interesit të shtetit dhe qytetarëve, pushteti ka zgjedhur ikjen, fshehjen dhe me këtë rast, edhe turpin. Ata nuk u paraqitën as sot në Kuvend, të paktën që të marrin kapelat e zeza që ua bëmë dhuratë. Nga jashtë sallës së Kuvendit, duke vazhduar të shtrijnë diktatin edhe në televizionin publik, RTK, komisarët e Kryeministrit tentuan ta heshtin opozitën dhe ta fshehin të vërtetën, duke mos transmetuar seancën që kishim ftuar sot në Kuvend”, ka shkruar Krasniqi në llogarinë e tij në Facebook.

Sipas kreut të PDK-së, nuk ka dyshim që shteti është i kapur nga Kurti dhe vartësit e tij.

“Por, aferat e tyre të fundit, të cilat tashmë kanë marrë dhenë, janë më të fuqishme sesa tendencat e tyre për manipulim. Tani, nuk ka më dyshime: shteti është i kapur! Mëkatet e Qeverisë janë zbuluar. Akterët po ashtu. E prapa të gjithëve, siç e kemi ditur gjithmonë, doli ai: kryeministri i vendit. Tash kanë mbetur vetëm dy gjëra para se kjo Qeveri të bie për t’u mos u kthyer më: prokuroria të bëjë punën e saj dhe qytetarët të votojnë për largimin e saj më 9 shkurt të vitit 2025. Rikthimi i Kosovës në drejtimin e duhur, të zhvilimit dhe të integrimit euro-atlantik, e ka vetëm një adresë: Bedri Hamza dhe Partia Demokratike e Kosovës!”, shtoi tutje Krasniqi./Arbresh.info