Disa ish-punëtorë të komunës paralele në veri të Mitrovicës janë tubuar në mëngjes, para objektit komunal në veri të Mitrovicës, duke protestuar për pamundësinë e tyre për të hyrë në objekt dhe për të punuar.

Tubimi vjen disa ditë pasi autoritetet e Kosovës mbyllën pesë institucione paralele serbe në veri të Kosovës, përfshirë komunën paralele të Mitrovicës, duke thënë se këto institucione po punonin nën udhëheqjen e Serbisë, duke e “cenuar kushtetutshmërinë dhe ligjet e Republikës së Kosovës”,

Policia e Kosovës, ka njoftuar se protesta ka qenë e paralajmëruar se në dy lokacione në Mitrovicë veri, do të mbahen protesta. Policia me kohë ka ndërmarrë masat e nevojshme për ofrimin e sigurisë dhe ruajtjen e rendit e qetësisë publike, para, gjatë dhe pas përfundimit të protestave.

Përmes një njoftimi për medie, Policia e Kosovës bën të ditur se protestat kanë qenë të paparalajmëruara.

“Sipas ligjit mbi tubimet publike, njihet e drejta e qytetarëve për shprehjen e lirë përmes tubimeve e protestave të qeta, dhe sipas detyrës zyrtare angazhohet që të ofrojë siguri për të gjithë qytetarët, përfshirë edhe protestuesit, në mënyrë që mbarëvajtja e protestave të kalojë e qetë dhe pa incidente”, thuhet në njoftim.

Tutje, Policia e Kosovës njofton se rreth orës 08:45 protestat kanë përfunduar të qeta dhe protestuesit janë shpërndarë, përderisa njësitet policore kanë vazhduar me detyrat e rregullta policore./rtk