Ministria e Mbrojtjes e Shqipërisë ka reaguar lidhur me situatën e zjarreve në Shëngjin dhe në disa zona të tjera në vend.

Ministria sqaron se në Shëngjin situata e raportuar ishte më problematike, megjithatë ka shënuar përmirësim në orët e mbrëmjes, pas ndërhyrjes së pandërprerë nga autoritetet dhe pas ndërhyrjes së dy avionëve Canadair të ardhur nga Italia, pjesë e mbështetjes nga Mekanizmi Evropian i Mbrojtjes Civile.

“Mirënjohje palës italiane për ndihmën si dhe palës suedeze për shprehjen e gatishmërisë. Sipas raportimeve të fundit është shmangur fatmirësisht rreziku për banesat dhe bizneset. Në orët e para të mëngjesit të nesërm do të fillojë sërish ndërhyrja nga ajri me mbështetjen e palës italiane dhe nga toka e qindra forcave operacionale.”, thuhet në reagimin e ministrisë.

Gjithashtu theksohet se është bërë e mundur shuarja e flakëve në vatrën e zjarrit në Kaninë, bashkia Vlorë, ku zjarri përfshiu një sipërfaqe me ullinj si dhe në Nikël, ku u raportua një tjetër vatër zjarri, gatë ditës së sotme./abcnews.al