66 emigrantë midis tyre 26 fëmijë janë zhdukur në ujërat italiane në Kalabri. Ndërsa rojet bregdetare shpëtuan 12 persona, ku njëri prej tyre ndërroi jetë.

Varka me 66 emigrantë u përmbys në ujërat italiane në afërsi të bregdetit të Kalabrisë. Midis tyre ishin 26 fëmijë, ndërsa u shpëtuan 12 persona.

Emigrantët po udhëtonin nga Turqia drejt Italisë.

Ndërkaq zyra e Prokurorit Publik të Locri u informua për tragjedinë e cila po koordinon veprimet për hetimin e kësaj ngjarjeje.

Shumica e emigrantëve janë nga Afganistani, Iraku, Siria dhe Irani.

“Unë fola me një djalë që humbi të dashurën e tij. Të mbijetuarit thanë se janë 66 persona të zhdukur, përfshirë të paktën 26 fëmijë, madje edhe disa muajsh. Familjet e tëra nga Afganistani kanë vdekur. Ata u larguan nga Turqia 8 ditë më parë dhe për 3 ose 4 ditë kanë qëndruar në det. Ata na thanë që udhëtuan pa jelekë shpëtimi dhe se disa anije nuk u ndalën t’i ndihmonin”, ka treguar Shakilla Mohammadi, ndërmjetësi ndërkulturor i Mjekëve pa Kufij, i pranishëm në Roçella Ionica ku zbarkuan të mbijetuarit e anijes në Detin Jon.

Roberto Occhiuto, presidenti i Rajonit të Kalabrisë tha se “seksioni turk, nga i cili duket se kanë mbërritur këta emigrantë, është nënvlerësuar shumë shpesh vitet e fundit. Do të duhej më shumë vëmendje nga Evropa dhe qeveritë kombëtare. Detet tona duhet të shkëlqejnë me jetën dhe shpresën, dhe jo të shndërrohen periodikisht në varreza të mëdha”./rtsh.a/