Sekretari i Jashtëm i Britanisë së Madhe, David Cameron pritet të zhvillojë të mërkurën një vizitë zyrtare në Tiranë.

Burime zyrtare bëjnë të ditur se pritja e zotit Cameron nga kryeministri Rama do të bëhet në selinë e qeverisë në orën 12:00, ndërsa të dy do të dalin para medieve në orën 13:00.

Ndërkohë Presidenca ka njoftuar se Sekretari i Jashtëm i Britanisë së Madhe pritet të takohet me Presidentin Bajram Begaj në ora 14:30.

Sekretari i Jashtëm i Britanisë së Madhe, Cameron do të takohet edhe me ministrin për Evropën dhe Punët e Jashtme, Igli Hasani.

Me rastin e vizitës së sekretarit të jashtëm britanik Tirana është veshur me ngjyrat e flamurit të Britanisë së Madhe.

Një fotografi e madhe që i uron mirëseardhjen Lordit Cameron është vendosur në korpusin qendror të Universitetit të Tiranës.

Sipas ambasadës britanike në Tiranë, “Sekretari i Jashtëm britanik do të nënvizojë suksesin e partneritetit tonë inovativ për t’i bërë ballë trafikantëve të qenieve njerëzore dhe emigracionit të paligjshëm si dhe ndikimin e investimeve britanike në parandalimin e emigracionit”./rtsh.al/