Qindra kontrata të lidhura vitin e kaluar nuk kanë qenë fare të planifikuara nga ministritë. Kjo është bërë e ditur nga një raport i organizatës INPO, e cila ka monitoruar aktivitetet e prokurimit të Ministrive dhe Zyrës së Kryeministrit.

Vitin e kaluar, Ministritë kanë lidhur 463 kontrata në vlerë prej 28 milionë eurove, pa qenë fare të planifikuara. Kështu thuhet në raportin e organizatës INPO, rreth performancës së Qeverisë në realizimin e prokurimit.

“Këto gjetje në përgjithësi , flasin për një mungesë të planifikimit të mirëfilltë nga ana e ministrive, përveç se nuk i janë përmbajtur planit të prokurorimit”, theksoi, Albulena Nrecaj-Musliu, drejtore ekzekutive në INPO.

Në raport thuhet se nga 935 aktivitete të cilat janë të planifikuara nga 17 autoritete kontraktuese, gjatë vitit 2023 janë iniciuar 336 aktivitete të prokurimit, të cilat kanë rezultuar me 489 kontrata.

“Për nga vlera këto 935 aktivite kanë pas vlerë të përbashkët 442 milion euro, ndërsa kontratat të cilat janë nënshkruar nga këto aktivitete të cilat janë edhe të planifikuara, kanë vlerën afër 84 milion euro, apo 19%”, tha Arbër Kabashi, monitorues në INPO.

INPO i ka rekomanduar Ministrive dhe Zyra e Kryeministrit të kujdesen që planifikimin vjetor të prokurimit ta bëjnë mbi bazën e indikatorëve matës dhe efikas./rtk