Zëvendësministri i Drejtësisë, Blerim Sallahu, së bashkë me UD. Drejtorin e Agjensionit për Administrimin e Pasurisë së Sekuestruar ose Konfiskuar,  Enver Krasniqi dhe me Shefen e Divizionit për Evropën Juglindore dhe Lindore të Ambasadës Gjermane në Prishtinë,  Heike Backofen -Wernecke, i kanë dorëzuar Shërbimit Korrektues të Kosovës një veturë të konfiskuar, e cila me përkrahjen e GIZ-it gjerman është shndërruar në autoambulancë.

Sipas ministrisë, kjo autoambulancë do të përdoret për nevojat e Qendrës Korrektuese për Femra në Lipjan, shkruan Arbresh.info.

“Ministria e Drejtësisë synon të kthejë pasuritë e konfiskuara në interes të përgjithshëm, duke shndërruar automjete në shërbime mjekësore si ky rast.”, thuhet në njoftim.

Përveç kësaj, përmes AAPSK-së, Ministria ka dhënë në shfrytëzim edhe dy banesa për qëllime sociale, si dhe automjete për nevojat e policisë dhe institucioneve të tjera.

“Ky përdorim i pasurive të konfiskuar synon të përçojë mesazhin se “krimi nuk vlen” dhe se çdo pasuri e fituar në mënyrë të paligjshme do të konfiskohet dhe përdoret për dobi të përgjithshme.”, thuhet mes të tjerash në njoftimin e ministrisë./Arbresh.info/