Presidenti i Shqipërisë, Bajram Begaj me rastin e 15 vjetorit të anëtarësimit në NATO  është shprehur se kjo është ndër datat më të rëndësishme të historisë kombëtare.

Me anë të një postimi në Facebook, ai u shpreh mirënjohës ndaj popullit shqiptar, SHBA-ve dhe aleatëve, të cilët siç u shpreh ai, mundësuan realizimin e këtij anëtarësimi, shkruan Arbresh.info.

“Data e 1 prillit të vitit 2009 jetësoi vizionin Euroatlantik të shqiptarëve për të qenë pjesë e Aleancës politiko-ushtarake më të fuqishme të kohës sonë. Ky anëtarësim realizoi aspiratën e kahershme të popullit shqiptar, duke e kthyer atë te përkatësia e vet perëndimore, e mishëruar që në filozofinë e heroit tonë kombëtar, Gjergj Kastriotit, si strateg i aleancës së parë politiko-ushtarake me Perëndimin.”, ka shkruar Begaj.

“Anëtarësimi i Shqipërisë në NATO është një ndër datat më të rëndësishme të historisë sonë kombëtare. Mirënjohës ndaj popullit shqiptar, SHBA-ve dhe aleatëve, të cilët mundësuan realizimin e këtij anëtarësimi.”, shtoi ai.

Begaj u shpreh se në këto 15 vite në NATO ka sjellë më shumë siguri për vendin, rajonin dhe hapësirën Euroatlantike.

“Krenar për efektivët e Forcave tona të Armatosura, si dhe vajzat e djemtë shqiptarë në misionet paqeruajtëse dhe operacionet e NATO-s, si: Afganistan, Irak, Bosnjë, Kosovë, Bullgari, Letoni dhe Deti Egje.”, shtoi presidenti shqiptar.

“Shqipëria do të vijojë të jetë e palëkundur që, së bashku me aleatët, të mbrojë lirinë e të kontribuojë për një botë në paqe.”, përfundoi ai./Arbresh.info/