Alenaca për Shqiptarët e Ziadin Selës i bashkohet Frontit Evropian. Ky vendim erdhi pas mbledhjes së Kuvendit Qendror të kësaj partie. Pas mbledhjes, Sela tha se Kuvendi në mënyrë unanime ka pranuar ofertën e Liderit të BDI-së, Ali Ahmeti. Ai tha se ky front pas zgjedhjeve do ta çoj vendin në BE.

“Kuvendi Qendror i Aleancës për Shqiptarët i tha po ofertës për tu bërë pjesë e Frontit Evropian, që Maqedoninë sa më shpejtë, me hapa sa më të sigurt, ta integroj dhe ta bëjë pjesë e BE-së. Ne jemi të gatshëm ashtu siç në të kaluarën por edhe në të ardhmen të marrim përsipër obligimet, mos i ikim përgjegjësisë, dhe ASH të jetë faktor ashtu siç ka qenë në të kaluarën”, tha Sela.

Sela nuk dha shumë detaje për ofertën të cilën e ka marrë nga kryetari i BDI-së Ali Ahmeti, por shtoi se ASH ka ditur të jetë transparente, e hapur dhe serioze para qytetarëve.

“Unë e kam thënë edhe në një paraqitje tjetër. Oferta është që minimumi ASH të ketë grup parlamentar si rezultat i zgjedhjeve të cilat do të ndodhin”, tha Sela

Kreu i ASH-së deklaroi se nuk përjashtohet mundësia që koalicioni të vlejë edhe për zgjedhjet e ardhshme lokale, por se për këtë nuk është biseduar për momentin./tvklan.mk