Paris Saint-Germain ka shënuar fitore me rezultat të pastër 2-0 në udhëtim ndaj Nantes, ndeshje kjo e cila ishte e vlefshme për xhiron e 22-të në Ligue 1.

Pjesa e parë u karakterizua me një dominim të madh të PSG-së në aspektin e posedimit të topit, por ishte mjaft e ‘varfër’ në aspektin e rasteve për gol.

I vetmi rast që ndezi këtë sfidë, ishte momenti kur mbrojtësi i Nantes, Nicolas Pallois (48’) shënoi gol për t’i dhënë avantazhin vendasve, por që më pas u anulua për pozitë jashtë loje.

Në pjesën e dytë ndryshuan gjërat dhe të dy ekipet filluan që të sulmonin njëra-tjetrën në kërkim të golit.

Ishte pikërisht Pallois (54’) ai i cili bëri një gjuajtje të fortë dhe u desh intervenimi i Donnarummas për të evituar golin.

PSG-ja mori avantazhin në minutën e 60-të pas një supergoli të Lucas Hernandez për 1-0 pas asistimit të Marquinhos.

Goli i dytë dhe ai që vulosi fitoren e mysafirëve në këtë takim, u shënua nga Kylian Mbappe (78’) i cili e shndërroi në gol penalltinë të cilën e fitoi vet për rezultatin 2-0.

Me këtë fitore Parisi vazhdon si lider me 53 pikë të tubuara, 14 më shumë se vendi i dytë që mbahet nga Nice./Telegrafi/