Ministri i Administrimit të Pushtetit Lokal, Elbert Krasniqi së bashku me ministrin e Punëve të Brendshme, Xhelal Sveçla, kanë vizituar fshatin Vranisht të Dragashit, ku kanë bërë  të ditur se janë mbyllur katër komuna paralele që kanë operuar ilegalisht për shumë vite.

Krasniqi në videon e publikuar thotë se këto komuna kanë qenë përgjegjëse edhe për komunën e Prizrenit, Suharekës dhe Rahovecit., përcjell Arbresh.info.

“Kosova ka komuna që janë përgjegjëse për ofrimin e shërbimeve të të gjithë qytetarëve. Ky objekt sikurse edhe objektet tjera që kanë vepruar në Kosovë janë jashtë juridiksionit të Kosovës dhe si të tilla nuk kanë vend në Kosovë”, tha Krasniqi.

Kurse ministri Sveçla theksoi se kriminaliteti do të luftohet në çdo cep të Kosovës.

“Ashtu siç edhe jemi zotuar, në çdo cep të Kosovës do të luftohet kriminaliteti, ilegaliteti dhe cfarëdo shkelje e ligjit”.

“Në Kosovë do të ketë organe legjitime që do t’iu shërbejnë të gjithë qytetarëve pa dallim. Nuk ka vend për Serbinë përveç ambasadës së saj në Prishtinë”, tha Sveçla.

/Arbresh.info/