Kryetari i AAK-së, Ramush Haradinaj, ka bërë homazhe tek varrezat e dëshmorëve në Gjilan si dhe në zbulimin e shtatores së heroit Kadri Zeka, në 42-vjetorin e rënies.

Haradinaj me anë të një postimi në Facebook, ka shkruar se vëllezërit Jusuf e Bardhosh Gërvalla si dhe Kadri Zeka, ishin vazhdimësi e përpjekjeve për liri.

“Vëllezërit Jusuf e Bardhosh Gërvalla dhe Kadri Zeka, ishin veprimtarët e hershëm të lëvizjes sonë kombëtare për liri e për pavarësi. Ata ishin vazhdimësi e përpjekjeve tona për çlirim dhe për të drejtën tonë të mohuar me dekada. Sot, në 42-vjetorin e rënies heroike, me kolegë bëmë homazhe tek varrezat e dëshmorëve në Gjilan, në kujtim e nderim të jetës dhe veprës së heroit Kadri Zeka”, ka shkruar Haradinaj.

Haradinaj ka marrë pjesë edhe në zbulimin e shtatores së heroit Kadri Zeka në Gjilan.

“Po ashtu, Kadriu u shndërrua në bronz në mes qyteti prej ku i bënë roje Gjilanit të Mulla Idrizit e Idriz Seferit, të Agim Ramadanit e të shumë heronjve e dëshmorëve nga kjo trevë”, ka shtuar Haradinaj.

Haradinaj është shprehur se rruga drejt lirisë nuk u ndal asnjëherë.

“Dora e armikut ishte kudo në ndjekje të shqiptarëve, sepse armiku kishte kuptuar saktë se rreshtimi ynë në anën e drejtë të historisë ishte në rrugë të pakthyeshme, i vendosur dhe i drejtë, prandaj nuk kursente asgjë për ta ndalë e shuar përpjekjen tonë.Rruga drejt lirisë nuk u ndal asnjëherë. Ishte nisur qysh herët, vazhdoi me Jusufin e Bardhoshin krah Kadriut, kulmoi me luftën tonë çlirimtare duke sjellë lirinë për Kosovën. Lavdi të rënëve për liri në të gjitha etapat e historisë sonë të lavdishme!”, ka përfunduar Haradinaj./Arbresh.info