Kryetari i Lidhjes Demokratike të Kosovës (LDK) Lumir Abdixhiku ka thënë se me “Rrugën e re”, në fokus kanë teknologjinë informative dhe arsimin, të cilat sipas tij, janë dy shtyllat thelbësore.

Kështu tha Abdixhiku përmes një postimi në llogarinë e tij në Facebook, teksa bëri të ditur se ka vizituar sot shkollën trajnuese në fushën e teknologjisë, akademinë jCoders, përcjell Arbresh.info.

Mes tjerash, kryetari i LDK-së, ka theksuar se me platformën “Rruga e re”, ka paraparë edhe trajnimin e mbi 40 mijë nxënësve, investime 30 milion euro në laboratore teknologjike shkollore si dhe kodimin si lëndë mësimore që nga klasa e parë.

Postimi i plotë:

Pasditen e sotme e kalova në mesin e nxënësve të Akademisë jCoders, shkollës trajnuese në fushën e teknologjisë të mbi 1000 fëmijëve gjithandej Kosovës ??. Aty u prita nga Arta Shehu Zaimi, themeluesja e kësaj shkolle.

U gjenda mes programerëve të rinj, fëmijëve e nxënësve me talente të jashtëzakonshme, atyre që të bëjnë të kuptosh se e ardhmja e Kosovës është thjeshtë e ndritur dhe bukur . Më prezantuan dhe punimet e tyre; Paridi për shembull na prezantoi programin e tij që çdo lëvizje trupore e përkthente në imazh simbolesh; ndërsa Rona e Driti na prezantuan webfaqet e tyre të programuara në gjuhën javascript. Më pas na prezantoi dhe Dua, fluturaken e saj të ndërtuar në LabBox . Secili nxënës aty kishte një shkathtësi teknologjike të fituar në këtë shkollë.

Në një vend si Kosova, ku sistemi shtetëror na prodhon PISA-n dhe renditjen tmerruese në fund, shkollat trajnuese në hap me zhvillimet e kësaj dekade bëhen domosdoshmëri. Ato na shërbejnë si model se si duhet të investojmë në teknologji; e si sistemi edukativ, ky që na prodhon PISA-n e sotme, duhet të na transformohet shpejtë në krijues të talenteve botërore.

Kosova e ka këtë mundësi!
E pashë sot nga afër mu këtu.
Mundemi dhe duhet që mundësinë e 1000 fëmijëve në jCoders, sikurse dhe në shkolla të ngjashme të nisura nga Arta e të tjera Arta plot, ta amplifikojmë në gjithë vendin.

Prandaj në ‘Rrugën e Re’ kemi paraparë fokus në teknologji informative e në arsim; si dy shtylla thelbësore tonat. Kemi paraparë, ndër të tjerash, edhe:
Trajnimin e mbi 40 mijë nxënësve e të rinjve në programim e teknologji.
Investime 30 milion euro në laboratore teknologjike shkollore.
Kodimin si lëndë mësimore që nga klasa e parë.

Artën dhe ekipin e saj, e falënderova për pritjen dhe punën motivuese si ndërmarrëse e inivatore që po bën sot. Ajo me gjithë nxënësit aty, ishin inspirim!/Arbresh.info