Platforma e medias sociale, X ka humbur vlerë të konsiderueshme që kur miliarderi Elon Musk e bleu atë, një vit më parë me emrin Twitter, sipas raportimeve të medias.

”Në një ndarje të aksioneve për punonjësit, X u vlerësua në një total prej 19 miliardë dollarësh”, raportoi të hënën revista ”Fortune” dhe agjencia e lajmeve financiare Bloomberg.

Musk pagoi rreth 44 miliardë dollarë për Twitter në tetor 2022.

Që atëherë, Musk e riemërtoi atë X dhe tha se dëshiron të ndërtojë platformën si një aplikacion me më shumë funksione, duke përfshirë shërbimet financiare.

Platforma ka qenë në vështirësi që nga marrja në dorëzim për shkak të një rënieje të konsiderueshme të të ardhurave nga reklamat.

Shumë kompani po shmangin X si një platformë reklamimi sepse kanë frikë nga një mjedis negativ për markat e tyre.

Musk po përpiqet të mbushë boshllëkun me të ardhurat nga abonimet.

Përveç kësaj, ai mori hua prej rreth 13 miliardë dollarësh për blerjen, të cilat tani po rëndojnë mbi X dhe që po grumbullojnë interes prej rreth 1,2 miliardë dollarë në vit./cityradioalbania