Presidentja eKosovës, Vjosa Osmani, ka përkujtuar atdhetarin Ukshin Hoti në 24-vjetorin e zhdukjes së tij, për të cilin tha se fati i tij mbetet ende i pazbardhur.

Presidentja tha se Hoti, në rrethana ende të pandriçuara është rrëmbyer me dhunë, teksa sipas saj, përpjekja për të zbardhur fatin e tij nuk është ndalur asnjëherë.

“Prej 24 vjetësh, fati i atdhetarit e intelektualit Ukshin Hoti mbetet i pazbardhur, teksa emri i tij vazhdon të mbetet në listën e të zhdukurve me dhunë nga regjimi gjenocidal i Serbisë”.

“Besniku i idesë së Republikës është referencë e jona e vazhdueshme për angazhimin kombëtar. Ukshin Hoti është njeriu që mendimin politik dhe aktivitetin politik i bëri bashkë në dobi të mirë të përmbushjes së idesë për Kosovën shtet”, tha Osmani.

Osmani e cilësoi Hotin si simbol të lirisë e demokracisë, ku tha se “këto parime na udhëheqin në rrugëtimin e fuqizimit të shtetit, ndërsa angazhimi ynë për zbardhjen e fatit të tij nuk do të ndalet asnjëherë”./Arbresh.info/