Kryeministri i Kosovës, Albin Kurti, ka treguar arsyet pse është vendosur që takimi i 18 marsit Kurti – Vuçiq me ndërmjetësit evropianë të zhvillohet në Shkup.

Në Forumin Ekonomik që po mbahet aktualisht në Shkup, Kurti ka thënë se më 1999, në Kumanovë është nënshkruar kapitullimi i Jugosllavisë dhe hyrjes së KFOR-it në Kosovë.

”Mos të harrojmë që më 9 qershor të vitit 1999 në Kumanovë ishte nënshkruar kapitullimi i Jugosllavisë së Millosheviqit dhe së hyrjes së forcave të NATO-s në Kosovë mendoj që këto elemente simbolike kanë qenë të rëndësishme për Josep Borrell që të na ftojnë këtu për takimin e radhës të nivelit të lartë”, tha Kurti.

Megjithatë ai nuk pati vetëm këtë shpjegim.

Ai ka përmendur edhe afërsinë e Shkupit me Prishtinën dhe Maqedoninë e Veriut si vend i cili ka avancuar në zhvillimin e demokracisë, sundimit të ligjit dhe integrimeve evropiane.

”Shkupi është qyteti i madh më i afërt me Prishtinën, po ashtu mendoj që ka impakt të madh në rajonin në kuptim që Maqedonia e Veriut është një vend i cili avancon në kontekst të demokracisë, sundimit të ligjit dhe në kontekst të integrimeve evropiane. Republika e Kosovës zë vendin e 84 nga 180 vende dhe Maqedonia është në vendin e 85 për sundimin e ligjit. Në këtë kuptim jemi kampion për më të mirët”, ka deklaruar Kurti./arbresh.info