Deputetja e Partisë Demokratike të Kosovës (PDK), Eliza Hoxha, ka njoftuar se është sulmuar nga shtatë qenë, gjersa ka qenë duke u kthyer në shtëpinë e saj.

Në një postim në Facebook, Hoxha ka thënë se ajo është sulmuar te Qendra Klinike Universitare e Kosovës, teksa ka thënë se kjo është hera e tretë që i ndodh asaj, në vendin e njëjtë, përcjell arbresh.info.

“Sonte duke u kthyer në shpi mezi shpëtova nga sulmi i 7 qenëve tek qendra universitare. U rrëzova, u sakatova e se di qysh ika nga ta tu u mbrojtë me çantë…

Ama kjo është hera e tretë që më ndodhë në hapësirën e njejtë por në kohë të ndryshme, por hera e parë që po shkruaj pavarësisht që për raste të tjera kam reaguar”, ka thënë Hoxha.

Ajo ka kërkuar nga kryetari i Prishtinës, Përparim Rama, që të ndërmarrë diçka lidhur me sigurinë e qytetarëve në kryeqytet, sepse sipas saj, ajo ka kohë që ka humbur.

“Po i drejtohem kryetarit Rama e të tjerëve në Komunë pa dallim që me ndërmarrë diçka. Në studimet e shumta urbane për Prishtinën gjithmonë një nga atributet e forta të saj ka dal të jetë siguria në qytet. Ka kohë që Prishtina e ka humbur këtë atribut”, ka shkruar ajo.

Më tej, ajo ka theksuar se i do kafshët dhe pret që të gjehet një zgjidhje që nuk i dëmton as njerëzit e as ata./arbresh.info