Ministri i Mbrojtjes, Armend Mehaj ka thënë se autoritetet zyrtarë janë duke e monitoruar situatën në terren pas reshjeve të mëdha të shiut dhe vërshimeve në shumë pjesë të Kosovës.

Përmes një postimi në rrjetin social Facebook, Mehaj shtoi se FSK është e gatshme me të gjitha kapacitetet e saj tu dal në ndihmë qytetarëve, pa dallim, në secilën situatë emergjente.

“Ministria e Mbrojtjes, bazuar në Planin e Reagimit Kombëtar në Emergjenca, është në gatishmëri të plotë të reagoj me ekipet e specializuara të FSK-së, varësisht nga kërkesat për mbështetje të Agjencionit për Menaxhimin e Emergjencave”, shkruan Mehaj.

“FSK si çdoherë, në secilën situatë emergjente, është e gatshme plotësisht, me të gjitha kapacitetet e saj në dispozicion, që të realizoj detyrën ligjore të mbështetjes ushtarake të autoriteteve civile dhe qytetarëve tanë pa dallim”, ka shkruar Mehaj.

Si pasoj e reshjeve të mëdha të shiut janë vërshuar disa zona në komunën e Drenasit, Skenderajt, Podujevës, Mitrovicës dhe zonat e rrafshit të Dukagjinit./arbresh.info/