Zvarritjet në formimin e Bordit të Agjencisë Kosovare të Privatizimit (AKP) kanë lënë peng punëtorët e Fabrikës së Tubave të Ferizajt, të cilët tashmë 562 ditë janë duke protestuar në një tendë para Qeverisë së Kosovës.

Grevistët thonë se këto vonesa kanë ndikuar në shëndetin e tyre, pasi që, siç thonë ata, gjendja e tyre shëndetësore po përkeqësohet dita-ditës, shkruan Zëri.
Ata tregojnë se edhe qeverisja e re e vendit, e drejtuar nga kryeministri, Isa Mustafa, asnjëherë nuk i ka vizituar e as nuk u ka kthyer përgjigje në kërkesat për takime që ia kanë bërë.

Ish-punëtorët e Fabrikës së Tubave kanë hedhur akuza ndaj kryeministrit Mustafa edhe në vonesat e formimit të Bordit të AKP-së, e cila është vendimtare për ndarjen e mjeteve mbi 25 milionë euro si paga të papaguara pas largimit nga puna.

Njazi Asllani, kryetar i Këshillit Grevist, ka thënë se kanë humbur shpresat në institucionet e vendit, sa i përket shlyerjes së borxhit. Asllani rrëfen për vonesat e kërkesave të tyre edhe nga ana e anëtarëve të Bordit të kaluar.

Sipas tij, nëse Bordi do të formohet me pesë anëtarë, emrat e të cilëve tashmë janë në Kuvend të Kosovës, ka mundësi që kërkesa e tyre të zvarritet.