Kancelari i Austrisë tha pas takimit me Vladimir Putinin në Moskë javën e kaluar se presidenti rus është “në logjikën e tij të luftës” kur bëhet fjalë për Ukrainën.

Karl Nehammer i tha NBC në një intervistë se ai mendon se Putin beson se po e fiton luftën, përcjell Telegrafi.

Nehammer ishte lideri i parë evropian që takoi Putinin në Moskë që kur Rusia nisi agresionin e saj më 24 shkurt.

Ai theksoi se “duhet ta shikojmë në sy dhe duhet ta përballim me atë që shohim në Ukrainë”.

Para se të mbërrinte në Moskë të hënën e kaluar, Nehammer kishte vizituar Bucha-n, Ukrainë, qytetin jashtë Kievit, ku provat e vrasjeve dhe torturave janë shfaqur pas tërheqjes së forcave ruse.

Nehammer tha për “Meet the Press” se ai u përball me Putinin me atë që kishte parë në Bucha dhe “nuk ishte një bisedë miqësore”.

Ai shtoi se Putin tha se “ai do të bashkëpunojë me një hetim ndërkombëtar, nga njëra anë, dhe nga ana tjetër, ai më tha se nuk i beson botës perëndimore. Kështu që ky do të jetë problemi tani në të ardhmen”.