Presidentja e Kosovës, Vjosa Osmani, ka votuar në Fakultetin Teknik, në Prishtinë.

Pas votimit, Osmani ju ka bërë thirrje qytetarëve që të dalin e të votojnë.

“E dimë të gjithë se detyrimi qytetar nuk ka përfunduar më 17 tetor dhe sot është një ditë e rëndësishme. Është më rëndësi që qytetarët t’i përgjigjen këtij detyrimi në mënyrë që të plotësojnë kërkesat e tyre. I uroj të gjithë qytetarët për këtë ditë të rëndësishme”, tha Osmani.

Sot, 4 javë pas zgjedhjeve të 17 tetorit, mbahet raundi i dytë i Zgjedhjeve për Kryetarë të Komunave.

Raundi i dytë i zgjedhjeve mbahet në këto 21 komuna: Gjakovë, Gllogoc, Gjilan, Dragash, Istog, Kaçanik, Klinë, Fushë Kosovë, Kamenicë, Obiliq, Rahovec, Podujevë, Prishtinë, Prizren, Shtime, Viti, Vushtrri, Malishevë, Junik, Mamush dhe Kllokot.

Sipas listës përfundimtare të votuesve të certifikuar nga Komisioni Qendror i Zgjedhjeve, numri i qytetarëve me të drejtë vote në këto 21 komuna është: 1 milion e 260 mijë e 571 votues.

Numri i qendrave të votimit në këtë raund të dytë të zgjedhjeve është 575 me gjithsej 1,638 vendvotime./arbresh.info/