Saranda Daci ka debutuar në elitën e basketbollit turk, për skuadra Bursaspor, që pësoi humbje nga Antalya 76:75.

Ky është një hap i madh në karrierën e basketbollistes nga Peja, por edhe për basketbollin femëror në Kosovë.

“Kjo ka qenë ndeshja e parë për mua në Ligën e Turqisë, ku edhe njihet mjaft mirë në Evropë, si një ndër ligat më të forta evropiane. Ishte një ndjenjë e mirë dhe e veçantë për mua, për shkak se ishte ndeshja debutuese dhe shumë dramatike, sa që edhe humbëm në sekondat e fundit për vetëm një pikë”, është shprehur Daci për faqen zyrtare të FBK-së.

Ajo foli edhe për debutimin e saj me fanellën e skuadrës së saj Bursaspor.

“Ka qenë një paraqitje e mirë, pasi për 18 minuta sa isha në lojë kisha gjashtë pikë, pesë kërcime, katër asistime, një top të vjedhur dhe një bllokadë. Kam marrë besim se mund të jap edhe më shumë në ndeshjet tjera, ku së bashku me vajzat e ekipit do të luftojmë për më të mirën deri në fund”, shtoi tutje basketbollistja pejane.

Një nga basketbollistet kryesore të Përfaqësueses së Kosovës, ka folur edhe për mikpritjen në Turqi.

“Në Turqi po ndihem si në shtëpinë time mbase për shkak që njerëzit janë të afërm sikur te ne, por edhe kultura mes vendit tonë dhe Turqisë është pothuajse e afërt. I falënderoj për mikpritjen si vajzat që janë të mrekullueshme me një atmosferë dhe harmoni të mirë po ashtu njëjtë edhe stafi që janë të palodhshëm”, nënvizoi Daci, e cila më parë ka luajtur edhe në Superligën e Republikës së Çekisë, kurse në Kosovë ka fituar shumë trofe me Penzën, Prishtinën dhe Bashkimin.

“Të luaj në një ligë, siç është kjo në Turqi do ta cilësoja si një vlerë të madhe në karrierën time”, përfundoi Saranda Daci.