Ka filluar gjykimi i dytë në Dhomat e Specializuara të Kosovës në Hagë, ai kundër ish-krerëve të Organizatës së Veteranëve të Luftës (OVL), Hysni Gucati dhe Nasim Haradinaj.

Gucati dhe Haradinaj janë të pranishëm fizikisht në sallën e gjyqit ku ka nisur gjykimi ndaj tyre.

Në këtë seancë pritet që Prokurori i Dhomave të Specializuara të lexoj akuzat, të cilat rëndojnë mbi Gucatin dhe Haradinajn.

Ata akuzohen për vepra penale kundër administrimit të drejtësisë, shkruan arbresh.info.

Të dy këta u arrestuan më 25 shtator 2020, duke u transferuar për në Hagë, ku edhe janë duke u  mbajtur në paraburgim.

Hysni Gucati dhe Nasim Haradinaj po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.

“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020,  Gucati dhe Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara.

Gucati dhe Haradinaj ngarkohen se kanë bërë komente nënçmuese kundër dëshmitarëve të mundshëm dhe në mënyrë të përsëritur shprehen synimin e tyre për të dëmtuar punën e Dhomave të Specializuara.

“Me këto veprime, Gucati dhe Haradinaj shkelën fshehtësinë e procedurës dhe frikësuan dëshmitarë (të mundshëm) të Zyrës së Prokurorit të Specializuar dhe si pasojë penguan punën dhe hetimet e ZPS-së”, thuhej në njoftimin e Dhomave të Specializuara të Kosovës./arbresh.info/