Ka nisur konferenca përgatitore për gjykimin e ish krerëve të Organizatës së Veteranëve të Luftës, Hysni Gucati dhe Nasim Haradinaj.

Seanca përgatitore për gjykimin është e caktuar me rregullën 117 të Rregullores së Procedurës he Provave të Dhomave të Specializuara të Kosovës.

Në këtë konferencë Nasim Haradinaj ka hequr dorë nga e drejta e tij për tu paraqitur në sallë, mirëpo e përfaqëson mbrojtja e tij, ndërsa Hysni Gucati është i pranishëm, raporton arbresh.info

Kujtojmë që Hysni Gucati, së bashku me Nasim Haradinajn, po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.

“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020, z. Gucati dhe z. Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara./arbresh.info/