Kosova U18 po vazhdon përgatitjet për FIBA European Challengers, që do të zhvillohet nga 3 deri më 8 Gusht në Tiranë të Shqipërisë.

Basketbollistët e rinj të Kosovës tashmë janë në fundin e përgatitjeve, kurse të dielën do të udhëtojnë drejt kryeqytetit shqiptar ku do të zhvillohet gara.

Përzgjedhësi i Kosovës U18, Bekim Maxhuni është shprehur i kënaqur me rrjedhën e stërvitjeve deri më tani.

“Grumbullimet e para i kemi pasur para dy muajve. Deri më tani jam i kënaqur me atë se çfarë kanë dhënë basketbollistët në stërvitje. Jemi munduar që të përgatitemi sa më mirë. Atmosfera ka qenë shumë pozitive nga fillimi i përgatitjeve e deri më tani”, është shprehur Maxhuni për faqen zyrtare të FBK-së.

Kosova është në grup me Shqipërinë dhe Moldavinë.

“Ne udhëtojmë për fitore. Duke marrë parasysh përgatitjet që i kemi pasur jam optimist. Do të mundohemi të shënojmë dy fitore në grup, e më pas normalisht varet edhe nga fati e lëndimet e mundshme”, shtoi tutje Maxhuni.

Sfidën e parë Kosova e ka ndaj Shqipërisë më 3 Gusht, kurse pas dy ditësh përballet me Moldavinë. Dy kombëtaret e para kualifikohen tutje. Varësisht nga rezultatet në grup, më pas do të garohet për pozitat tjera.

Kosovës U18 në ditët e fundit i janë bashkuar edhe Dion Sheqiri dhe Albatrit Syla që garuan me Kosovën U20 në Hungari. /Telegrafi/